Whāia te karanga

Kia ora e te whānau! He whakaaro auaha tēnei e pā ana ki te āhuatanga o ngā haerenga kia whai whakaaro, kia whai wheako i te ao nei e huri tonu ana. Ngā mihi!

Nō te ngahere i wehe atu te wahine,

tōna mana whenua i muri tonu i a ia.

Auē te kaha o te karanga i pā katoa ai i a ia,

pō iho, ao ake. Tē taea te wareware.

 

Ahakoa tonu, te pora hoki o tōna kite whakamua.

He wātea e takoto noa atu ana,

ngoikore katoa te āhuatanga, āna, kai a Tāwhirimātea te rangatiratanga.

“Kai hea ngā tamariki a Tāne? Kai hea ōku hoa piritahi?”

Kātahi anō te mokemoke e pā ana ki a ia,

wiriwiri kau ana te wairua,

he waipuke kei ōna kamo,

tōna kī whakamutunga,

“e noho rā Tāne.”

 

I haere tōtika ia,

tae noa ki te ngaronga a Tāne.

Kei tua rawa he wāhi mōna, kua mōhio.

Warea kē ia e te karanga e pā mai nei

kia kohia, kia kaingia ngā hua ō ngā rākau rerekē;

kia mārama te ao.

 

Nawai rā, nāwai rā,

kāore tonu ia e rongo ana i a Tāne

kai tata ia, kei roa rawa kē rānei, ko wai ka mōhio?

Ko Tāwhirimatea anahe e kitea nei.

He mamae tō te tinana, nā

kei te poho o te wātea e noho ana ia.

 

Kātahi, pā katoa anō ana taua karanga ki a ia.

E huri ana tōna rae ki te whenua, hongi anō ai rāua ko Papa.

Koia tonu te wā e noho tahi ana ia rātau ko Papa ko Tāne.

E rongo ana ia i ngā pū o Tāne i raro i te wātea

nō tōna mana whenua,

ki te wātea nei,

ki te ngahere kei wāhi kē.

 

I muri tata tonu mai

kotahi tonu tana ki mua.

Ahakoa rā tē kitea te ngahere kai tua rawa atu,

ko nāia tonu e mahara ana ia,

nō raro tonu te mana.

 

 

Featured in Salient magazine's Te Ao Mārama issue
Visual by Ewan Pickering